Letra: Celso Emilio Ferreiro (poema titulado “Spiritual”, do libro “Longa noite de pedra”)

Adaptación da letra: Carlos e Fran Amil

Música: Fran e Carlos Amil

O poeta de Celanova (Ourense) Celso Emilio Ferreiro é o bardo con máis versións musicadas da súa obra. E é que en cada verso de Ferreiro abrolla un ritmo cantable que ten a forza dun imán.

Mentres canto o corazón vai comigo e con il falo, e todo canto hai no mundo é unha nota que me irmanda con tódolos homes e mulleres que me prestan os seus ouvidos.

Fran Amil: voz principal, coros e batería

Paco Cerdeira: guitarra eléctrica

Antón Fernández “Torroncho”: baixo

Ricardo Casás “Richi”: saxo tenor

Lembrade que podedes ler a letra ao tempo que escoitades a canción.

Cicais mañá
cando a miña mirada
non abrolle na luz
como cativa mapoula de auga,
veña a soedade.
Pero hoxe canto en libertá
e mentres canto
non estou isolado,
que o corazón vai comigo
e con il falo. (X2)
Beberei a paisaxe
nun amencer de lirios.
As campanas do mar
nos ventos fuxidíos.
Cada intre un paxaro,
cada pulso un latexo.
Unha espada de chuvia
cortando a frol do vento.
Nin as olladas torvas,
nin os beizos esquivos,
nin as voces nemigas
nin os homes cativos.
E mentres canto
non estou isolado,
que o corazón vai comigo
e con il falo. (X2)
Vivirei coma o lume
alcendido na noite.
Terei cumios de estrelas,
cantarei para os homes.
Estou comigo mesmo.
O corazón é quen manda,
i eu obedezo.
E mentres canto
non estou isolado,
que o corazón vai comigo
e con il falo. (X2)

Se queres ver máis letras do disco “Popsía Vol. I” pincha AQUÍ.